هي صعبة كدا لية ؟؟

من شوية كنت بفكر احنا اخرة الطحن اللي مطحونين فيه دا اخرته ايه ؟!

يعني الواحد مفحوت شغل 24 ساعه عشان يدوب يقدر يوفر شوية مصاريف حتي ولو كنت عارف ان دي مرحله مؤقته الا انها محيراني  جدا .... هل حياتنا هتفضل كدا 

طب هل ربنا خلقنا لكدا اانا نفضل ندور في الساقيه بتاع الحياه دي بالشكل الغير الأدمي دا وتقصير في حق ناس قريبين لينا وحق اهلنا وحق نفسنا اننا حتي مش بنلاقي وقت لنفسنا 

الموضوع غريب وصعب انك تبقي شايف الاهالي اللي شغال شغلانتين او اكتر عشان بس يقدر يصرف علي عياله 

ماهو اكيد في حل يعني خصوصا في ظل التضخم الاقتصادي اللي بقينا عايشين فيه دا 

ومع محاولات التفكير اللي بتجيب للواحد صداع قدرت اوصل لفكره وهي "الفكرة"

الفكرة اللي تخليني اقدر اقلل من ساعات شغلي وفي نفس الوقت يكون العائد بتاعها اكبر 

وهنا هنروح لحتة مهمه اوي ان الفكرة دي مش هتيجي من فراغ لا دي هتبقي عصارة مجهود وتعب والتزام وارادة في التعليم بغرض ان تطور نفسك وتبقي اتقل في مجالك وقتها ممكن الفكرة تلمع في دماغك 

من ناحية تانيه هتلاقي نفسك محطوط في كماشة الاحتياج سواء المادي او غيره 

هل افرغ نفسي للتطوير عشان الاقي عائد مادي كويس ولا افضل زي مانا بالعائد القليل والمجهود الكبير 

وبيزداد الضغط النفسي علي الواحد كل ماكان مسؤلياته اكبر سواء متجوز او عنده اولاد

لكن من رؤيتي ان كل اللي جم علي نفسهم عشان يطورو من خبرتهم او حتي يتقنو حاجه جديده وان كانو مرو بفترة عصيبه الا انهم قدرو يوصلو لنقطه خلتهم راضيين عن اللي بيعملوه ووصلوله 

الموضوع في النهايه نسبي من واحد للتاني ومش كل الناس تقدر تاخد القرار دا وكل ما كان الوقت متأخر في اخدان القرار كل ما هيبقي تنفيذه اصعب 

لكن في النهايه مينفعش نبطل محاولة ولازم يبقي عندنا صبر وارادة عشان نقدر نغير حالنا 

اتمني لكل واحد شايل مسؤليات كبيره ان ربنا يلهمه الفكرة اللي يقدر بيها يغير حياته للأحسن 

وربنا يعين الجميع 

ودمتم سالمين ^_^