شويه فضفضه كدا معاكم :D
في فتره من الفترات اقل من سنه كنت بفكر في الاكتئاب بشكل مبالغ فيه لدرجه اني كنت بتخيل نفسي كتير وانا بنتحر وكانت فتره كنت مشغول فيها جدا بين شغل ودراسه لحد ما قررت اني اروح لطبيب نفسي وساعتها شخصني اني عندي اكتئاب حاد وكتبلي ادويه اكتئاب :D
وبعد مامشيت فتره ع الادويه دي سألت نفسي هل انا عايز افضل ماشي ع الادويه وكانت الاجابه لا ووقفت الادويه وقولت للدكتور انا عايز احارب اكتئابي من غير ادويه لأني عارف اني اقوي منه وانها فتره وهتعدي وبدأت فعلا اغير من طريقه تفكيري والدكتور ساعدني كتير جدا كنت بخرج من كل جلسه وانا كلي امل وطاقه وتفائل بقيت اعرف ابص للأمور من منظور مختلف
سألني مره هل الجلسات دي مفيده ليك قولتله انا نفسي اصرخ واقول لكل الناس روحو لدكاتره نفسيين لأن حقيقي الكلام معاهم بيفرق
انت بتتكلم مع شخص فاهم ومش هيمعلشك وخلاص ولا هيقلل من الظروف اللي انت فيها وهيقدر يدلك علي حجات يمكن انت مكنتش واخد بالك منها او مكنش عندك الجرأه انك تاخد الخطوات دي في حياتك :D
**شوفت مره واحد كاتب كلنا مرضي نفسيين بس ايه السبب في كدا احنا السبب في اننا خلينا بعض مرضي نفسيين
الصديق اللي مش بيسمع صديقه او البنت اللي بتتنمر علي زميلتها او الاهل اللي مهملين اولادهم ومشاعرهم كل دا قادر يخلي مننا مرضي نفسيين
كلنا محتاجين نحس اننا مهمين في حياه حد وان وجودنا ليه قيمه محتاجين نحس بالتقدير
كل واحد فينا محتاج حاجه معينه في حياته ولما مش بيلاقيها بيضطر يدور عليا في طريق تاني ويمكن يكون طريق غلط
كونو رحماء بنفسكم وب اللي حواليكم ولو لقيتم حد محتاج انه يسمع ليكم احكوله ولو حد محتاج تسمعوله متكسلوش تعملو دا عل وعسي نكون سبب في اننا نفرج هم مهموم فربنا يفرج همنا 🖤
